खैराट येथे कुत्र्यांनी पाडला नऊ बकऱ्यांचा फडशा.
पाच बकऱ्या जखमी
रायगड वेध श्रीकांत नांदगावकर तळा
तळा तालुक्यातील खैराट येथे शेड मध्ये शिरलेल्या कुत्र्यांनी नऊ बकऱ्यांचा फडशा पाडला तर पाच बकऱ्या गंभीर जखमी झाल्या आहेत. खैराट येथील शेतकरी लक्ष्मण गोपाल भोईर यांनी बकऱ्या बांधून ठेवलेल्या शेड मध्ये शनिवार दि.१८रोजी दुपारी दोनच्या दरम्यान तीन कुत्री शिरली या कुत्र्यांनी केलेल्या हल्ल्यात नऊ बकऱ्या मृत्यूमुखी पडल्या तर पाच बकऱ्या गंभीर जखमी अवस्थेत आहेत.तालुक्यात सध्या भटक्या कुत्र्यांची मोठी दहशत पसरली असून भटक्या कुत्र्यांचे निर्बिजीकरण होत नसल्यामुळे त्यांची संख्या मोठ्या प्रमाणावर वाढली आहे.यामुळे या भटक्या कुत्र्यांबद्दल नागरिकांमध्ये सतत भीतीचे वातावरण पसरलेले असते.बकऱ्यांच्या कळपात जाऊन नऊ बकऱ्या फस्त करणारे भटके कुत्रे लहान मुलांवर देखील हल्ला करण्याची शक्यता असल्याने पालकवर्गामध्ये देखील भीतीचे वातावरण पसरले असून या भटक्या कुत्र्यांचा बंदोबस्त करण्याची मागणी नागरिकांकडून करण्यात येत आहे.
