मुंबई गोवा महामार्गावर नागोठणे नजीक अपघात
स्कुटी चालकाचा जागीच मृत्यू
अनिल पवार नागोठणे रोहा
मुंबई गोवा महामार्गावर नागोठणे पोलीस ठाण्याच्या हद्दीत वाकणनाका जवळील मौजे गोडसई येथील गुरुनानक ढाब्या जवळ स्कुटीला झालेल्या अपघातात स्कुटी चालकाचा जागीच मृत्यू झाल्याची घटना दि.८ रोजी रात्री ९.३० वाजण्याच्या सुमारास घडली.
यासंदर्भात नागोठणे पोलिसांकडून मिळालेल्या माहितीनुसार सुनिल परशुराम मरवडे (वय-३७ वर्षे) रा. तळवली, ता.रोहा हे आपल्या ताब्यातील होंडा कंपनीच्या अॅक्टिव्हा स्कुटीने मुंबई बाजूकडून कोलाड बाजूकडे जात असताना वाकण जवळील मौजे गोडसई येथील गुरुनानक ढाब्या जवळ आले असता त्यांनी त्यांच्या ताब्यातील स्कुटी अतिवेगाने, हयगयीने, रस्त्याच्या परीस्थितीकडे दुर्लक्ष करत चालवल्याने स्कुटी रोडच्या उजव्या बाजूला गोवा-मुंबई असे जाणार्या चुकीच्या मार्गावर गेल्याने स्कुटी घसरल्याने झालेल्या अपघातात सुनिल यांस गंभीर स्वरूपाच्या दुखापती झाल्याने त्यांचा जागीच मृत्यू झाला.या अपघाताची नोंद नागोठणे पोलीस ठाण्यात करण्यात आली असून पोलीस निरीक्षक तानाजी नारनवर यांच्या मार्गदर्शनाखाली पो.ह. अतुल जाधव हे अधिक तपास करीत आहेत.
