रविवारी म्हसळ्यात खासदार सुनिल तटकरे यांचे हस्ते विविध विकासकामांचे उद्घाटन व भूमिपूजन कार्यक्रमाचे आयोजन
रायगड वेध श्रीकांत बिरवाडकर म्हसळा
म्हसळा तालुक्यातील वरवठणे गणात साळवींडे व तोराडी येथे रविवारी दि.13 फेब्रुवारी रोजी खासदार सुनिल तटकरे यांचे शुभहस्ते विविध विकास कामांचे उद्घाटन व भूमिपूजन कार्यक्रमांचे आयोजन करण्यात आले असल्याची माहिती राष्ट्रवादी काँग्रेसचे वरवठणे गणाचे अध्यक्ष सतिश शिगवण यांनी दिली आहे.
तालुक्यातील साळवींडे ग्रुप ग्रामपंचायत कार्यालयाची नवीन इमारत उद्घाटन, जलजीवन मिशन अंतर्गत कार्यक्रम 2021-22 साळवींडे येथे नळपाणी पुरवठा योजना भूमिपूजन, साळवींडे देवळाचीवाडी डोंगरी विकास अंतर्गत अंगणवाडी इमारत भूमिपूजन तसेच तोराडी येथे नळपाणी पुरवठा योजना भूमिपूजन, अंतर्गत रस्त्याचे उद्घाटन व अन्य विकास कामांचे भूमिपूजन कार्यक्रम यावेळी खासदार सुनिल तटकरे यांचे हस्ते व पालकमंत्री आदिती तटकरे, आमदार अनिकेत तटकरे, जिल्हा परिषद सभापती, पंचायत समिती सभापती, उपसभापती यांचे प्रमुख उपस्थितीत संपन्न होणार आहेत. तसेच या कार्यक्रमाचे दरम्यान काही अन्य पक्षातील नाराज पदाधिकारी व कार्यकर्ते राष्ट्रवादी काँग्रेस पक्षात प्रवेश करणार आहेत असे वरवठणे गण अध्यक्ष सतिश शिगवण यांनी माहिती देताना सांगितले आहे. तसेच अनेक वर्षे प्रलंबित असलेली साळवींडे ग्रामपंचायत नवीन इमारत मंजूर करून बांधकाम केल्याने स्थानिक नागरिकांमध्ये समाधानाचे वातावरण असून उद्घाटन कार्यक्रमाची जय्यत तयारी सुरू असल्याचे साळवींडे ग्रामपंचायत सदस्य तथा ओबीसी सेल वरवठणे गण अध्यक्ष महेश घोले यांनी सांगितले आहे. उद्घाटन कार्यक्रम प्रसंगी तालुक्यातील सर्व पदाधिकारी व कार्यकर्ते यांनी उपस्थित रहावे असे आवाहन वरवठणे गण अध्यक्ष सतिश शिगवण यांनी केले आहे.
