🛑मुंबई गोवा महामार्गावर वाकण नजीक मोटार सायकल ट्रक अपघात🛑मोटार सायकल स्वार जागीच ठार,एक जण गंभीर जखमी

🛑मुंबई गोवा महामार्गावर वाकण नजीक मोटार सायकल ट्रक अपघात

🛑मोटार सायकल स्वार जागीच ठार,एक जण गंभीर जखमी

रायगड वेध नागोठणे, रोहा अनिल पवार

 मुंबई गोवा महामार्गावर वाकण नजीक इंडियन ऑईलच्या पेट्रोल पंपा समोर दि.०७ रोजी सकाळी ११.१५ वाजण्याच्या सुमारास मुंबई बाजू कडून महाड बाजूकडे जाणार्या ट्रक आणि मोटारसायकल यांच्यांत अपघात होऊन यात गंभीर स्वरूपाची दुखापत झाल्याने मोटारसायकलस्वाराचा अपघात स्थळीच मृत्यू झाला असून मागे बसलेला इसम गंभीररीत्या जखमी झाला आहे.

यासंदर्भात मिळालेल्या माहितीनुसार नागोठणे पोलीस ठाण्याचे हद्दीतील वाकण नजीक इंडियन ऑईलच्या पेट्रोल पंपासमोर नागोठणे येथील रहिवासी असलेले रऊफ चिपळूणकर आणि किरण काळे हे दोघे मोटारसायकलवरून नागोठणे बाजूकडून वाकण बाजूकडे जात असताना मुंबई कडून महाड बाजूकडे जाणार्या ट्रकची मोटार सायकलला मागूू जोरदार धडक बसली. या अपघातात मोटार सायकल चालक रुऊफ चिपळूणकर यांच्या शरीरावरून ट्रकचेे चाक गेल्याने त्यांचा जागीच मृत्यू झाला तर मोटार सायकलवर पाठीमागे बसलेल्या किरण काळे यांच्या पायाला गंभीर स्वरूपाची दुुुुखापत झाली असून त्यांच्यावर नागोठणे प्राथमिक आरोग्य केंद्रात प्राथमिक उपचार करून पुढील उपचारासाठी पनवेल येथील रुग्णालयात पाठविण्यात आले.या अपघातानंतर संतप्त जमावाने मुंबई गोवा महामार्गावर रस्ता रोको केला. कोणताही ठोस निर्णय होत नाही तोपर्यंत जमावाकडून मृतदेह बराच काळ अपघात ठिकाणीच ठेवण्यात आल्याने तणावाचे वातावरण निर्माण झाले होते. यावेळी कोणताही अनुचित प्रकार घडू नये यासाठी नागोठणे पोलीस घटनास्थळी हजर होते. या अपघाताची माहिती मिळताच परिस्थितीचे गांभीर्य लक्षात घेता रायगड जिल्हा अप्पर पोलीस अधीक्षक सचिन गुंजाळ यांनी अपघात स्थळी धाव घेतली.यावेळी पोलीस उपअधीक्षक किरणकुमार सुर्यवंशी, नागोठणे पोलीस निरीक्षक तानाजी नारनवर,वडखळचे पोलीस निरीक्षक बाळा कुंभार,कोलाडचे सुभाष जाधव,रोहाचे पोलीस निरीक्षक सुभाष पाटील, महामार्ग वाहतूक पोलीस यांच्यासह पोलीस कर्मचारी उपस्थित होते.

--------------------

सुमारे दोन तास मुंबई गोवा महामार्गावर रस्ता रोको

मुंबई गोवा महामार्गाचे गेली १२ वर्षे कासवगतीने सुरू असलेले चौपदरीकरणाचे काम तसेच या मार्गाची झालेली दुरवस्था यामुळे मुंबई गोवा महामार्गावर अपघातांची मालिका सुरूच आहे.याच महामार्गावर पडलेले मोठमोठ्या खड्ड्यांमुळे अनेक अपघात घडले असून यात अनेकांना आपले प्राण गमवावे लागले आहेत. याच महामार्गावर पळस नजीक काही महिन्यांपूर्वीच अपघात होऊन दोन तरुणांना आपला जीव गमावावा लागला होता. त्यामुळे या महामार्गाचे काम करणार्या जे.एम.म्हात्रे इफ्रा या कंपनीवर मनुष्यवधाचा गुन्हा दाखल करण्यात यावा यासाठी संतप्त जमावाने रस्ता रोको केला.त्यामुळे मुंबई गोवा महामार्गावर सुमारे दोन तास वाहतूक कोंडी झाली होती.या दरम्यान महामार्गावर दोन्ही बाजूला दोन तीन किलोमीटर अंतरावर वाहनांच्या लांबच लांब रांगा लागल्या होत्या. यावेळी उपस्थित अप्पर पोलीस अधीक्षक सचिन गुंजाळ यांनी जमावाला अश्वाशित केल्याने सुमारे दोन तासांनंतर मृतदेह उचलत वाहतूक सुरळीत करण्यात आली. परंतु दिलेले आश्वासन पूर्ण होत नाही तोपर्यंत मृतदेह ताब्यात घेणार नसल्याचे नातेवाईक व जमावाकडून स्पष्ट करण्यात आले. 

-------------------

समृद्धी महामार्ग पूर्ण झाला मग मुंबई गोवा महामार्गाचे काम अपूर्ण का?

नागपूर मुंबई हा समृद्धी महामार्गाचे काम जर चार ते पाच वर्षांत पूर्ण होऊ शकले तर गेली १२ ते १३ वर्षांपासून सुरू असलेल्या महत्त्वाच्या असणाऱ्या मुंबई गोवा महामार्गाचे चौपदरीकरणाचे काम अजून अपूर्ण अवस्थेत का? या मार्गावर चौपदरीकरणाचे काम पूर्ण होता होता अजून किती जणांना आपले प्राण गमवावे लागणार ? विदर्भातील नेत्यांची समृद्धी महामार्गासाठी मानसिकता आहे मग कोकण व रायगडातील आमदार खासदार काय करताहेत, असे अनेक प्रश्न सर्व सामान्य जनतेतून उपस्थित होताना दिसत आहेत.