🛑गणेशोत्सवासाठी राज्य परिवहन रायगड विभाग सज्ज 🛑गणेशोत्सवासाठी पाठवणार कोकणात एक हजार ३०० एसटी बसेस

🛑गणेशोत्सवासाठी राज्य परिवहन रायगड विभाग सज्ज

🛑गणेशोत्सवासाठी पाठवणार कोकणात एक हजार ३०० एसटी बसेस

🛑ठिकठिकाणी तैनात ठेवली जाणार एसटीची दुरुस्ती पथके

रायगड वेध अनिल पवार नागोठणे

कोकणासह संपूर्ण महाराष्ट्रात, देशात याचबरोबर सातासमुद्रापार परदेशातही अतिशय भक्ती भावाने साजरा होणारा सण म्हणजे गणेशोत्सव. दर वर्षी चाकरमानी मुंबई, ठाणे, गुजरात, नवी मुंबईसारख्या महानगरातून तसेच रायगड जिल्ह्यातून गणेशोत्सव साजरा करण्यासाठी कोकणात मोठ्या प्रमाणावर गणेशभक्त वेळात वेळ काढून येत असतात. गतवर्षी कोरोना विषाणूचा वाढता प्रादुर्भाव रोखण्यासाठी शासनाने कडक निर्बंध लागू केल्याने गणेशभक्तांकडून शासनाच्या नियमानुसार अतिशय साध्या पद्धतीने सर्वत्र गणेशोत्सव साजरा करण्यात आला होता. यामुळे सर्व गणेशभक्तांचा हिरमोड झाला होता. यावर्षी मात्र सद्यस्थितीत काही प्रमाणात कोरोना विषाणूचा प्रादुर्भाव कमी होत असताना शासनाकडून लावण्यात आलेल्या निर्बंधांत काही प्रमाणात शिथिलता आल्याने गणेशभक्तांमध्ये आनंदाचे वातावरण पसरले आहे. याच पार्श्वभूमीवर कोकणात जाणार्‍या गणेशभक्तांसाठी राज्य परिवहन महामंडळाच्या रायगड विभागातून एक हजार ३०० बसेस सोडल्या जाणार आहेत. तसेच या सोडण्यात येणााऱ्या गाड्यांचे आरक्षणही पूर्ण झाले आहे. या गाड्यांव्यतिरिक्त पुढे गरज लागल्यास आणखीन १५० बसेस सोडण्याचे नियोजन राज्य परिवहन विभागाने केले आहे. दरम्यान गणेशोत्सासाठी पाठविण्यात येणाऱ्या या सर्व बसेसचे निर्जंतुकीकरण करण्याचे कामही सुरु असल्याचे राज्य परिवहन महामंडळाच्या रायगड विभागातून सांगण्यात आले आहे.

उत्सवप्रिय कोकणात गणेशोत्सव मोठ्या उत्साहात साजरा केला जातो. या सणासाठी मुंबई, ठाणे, गुजरात, नवी मुंबईसारख्या महानगरातून गणेशभक्त कोकणात दाखल होत असतात. ही महत्त्वाची बाब लक्षात घेऊन रायगडच्या राज्य परिवहन विभागाने यंदा विशेष तयारी केली आहे.

यातील गणेशोत्सवासाठी कोकणात सोडण्यात येणााऱ्या या गाड्यांपैकी सर्वाधिक साडेआठशे गाड्या ह्या ८ सप्टेंबरला सोडल्या जाणार आहेत. मुंबई-गोवा महामार्गावर वाहतूक सुरळीत रहावी, यासाठी विशेष खबरदारी घेण्यात आली आहे. यावेळी एसटीच्या गाड्यांमध्ये कोणत्याही प्रकारची तांत्रिक अडचणी निर्माण होऊन प्रवासी गणेशभक्तांना कोणताही त्रास सहन करावा लागू नये यासाठी मुंबई गोवा महामार्गावर कर्नाळा, रामवाडी, सुकेळी खिंड, वाकण फाटा, लोणेरे आणि कशेडी घाटात एसटी महामंडळाची दुरुस्ती पथके तैनात केेली जाणार आहेत.याशिवाय रायगड विभागातील रोहा आणि माणगाव या आगारातील फिरती दुरुस्ती पथके महामार्गावर उपलब्ध राहणार आहेत. याचबरोबर कोकणात जाणाऱ्या प्रवाशांच्या सोयीसाठी महामार्गावरील दोन खासगी हॉटेलमध्ये विशेष थांबेही देण्यात आले आहेत. गणेशोत्सव सणाला कोकणात जाणार्‍या चाकरमानी गणेशभक्तांच्या कोरोना विषाणूच्या पार्श्वभूमीवर आरोग्याच्या सुरक्षेसाठी खबरदारी घेत रायगडच्या राज्य परिवहन विभागाने महात्वाची पावले उचलली आहेत. एसटी बसने प्रवास करणार्‍या प्रवाशाच्या आरोग्याच्या दृष्टीने कोकणात जाणाऱ्या या सर्व बसेस नव्या पद्धतीचा अवलंब करून अँटी बॅक्टेरियल स्प्रेने निर्जंतूक करण्यात आल्या आहेत. यामुळेे गणेेशोत्सवासाठी कोकणात जाणाऱ्या गणेश भक्तांसाठी राज्य परिवहन महामंडळाच्या रायगड विभागाच्या वतीने सोडण्यात येणाऱ्या या गाड्यांमुळे

सर्व-सामान्य चाकरमान्यांचा प्रवास सुखकर होईल अशी अपेक्षा आहे.

----------------------------------------

"गणेशोत्सवाच्या अनुषंगाने रायगड विभाग हा सज्ज झाला आहे. प्रवाशांच्या आरोग्याच्या दृष्टीने योग्य ती काळजी घेण्यात आली आहे. प्रवाशांचा प्रवास हा सुखकारक व आनंददायी व्हावा, यासाठीही खबरदारी घेतली आहे. यासाठी मुंबई गोवा महामार्गावर ठिकठिकाणी एसटी महामंडळाची दुरुस्ती पथके तैनात केेली जाणार आहेत. १३०० बसेसची बुकींग झाली आहे. तर परतीच्या प्रवासासाठी १५० बसेसच्या फेर्‍या वाढविण्यात आल्या आहेत."

अनघा बारटक्के - व्यवस्थापक

राज्य परिवहन महामंडळ, रामवाडी-रायगड विभाग.