🛑मनात झाड लावल्याशिवाय जमिनीत झाड उगवणार नाही - वृक्षारोपण कार्यक्रमात कृषीकन्या नम्रता चौधरीचे मनोगत

Team Raigad vedh August 16, 2021 0

रायगड वेध म्हसळा प्रतिनिधी श्रीकांत बिरवाडकर

ग्रामीण जनजागृती कार्यानुभव उपक्रमाअंतर्गत म्हसळा तालुक्यातील खरसई येथे संपन्न झालेल्या वृक्षारोपन कार्यक्रमात प्रत्येकाने आधीच "मनामध्ये झाड लावल्याशिवाय जमिनी मधील झाड उगवणार नाही" सद्यस्थितीत निसर्ग वातावरण बदलाच्या दिवसात वृक्षारोपण करणे काळाची गरज असल्याचे मनोगत म्हसळा येथील कृषीकन्या नम्रता चौधरी हिने व्यक्त करताना सांगितले.

डॉ.बाबासाहेब सावंत कोकण कृषी विद्यापीठ दापोली येथे बी.एस.सी.ऍग्रीच्या चौथ्या वर्षात शिकत असलेली म्हसळा निवासी नम्रता चंद्रसेन चौधरी हीने ग्रामीण जनजागृती कार्यानुभव उपक्रमांतर्गत वृक्षारोपण कामी वृक्ष संगोपन आणि संवर्धन कार्यक्रमात हिरीरीने सहभाग घेत गाववाडीवस्तीत प्रचार व प्रसाराचे काम करीत आहे. नम्रताने खरसई येथील शेतकरी तुकाराम शितकर आणि भालचंद्र शितकर यांच्या शेताच्या बाधांवर वृक्षारोपण करून गावात जनजागृती करण्याचे काम केले.

यावेळी कार्यक्रमाला गाव अध्यक्ष नामदेव खोत, शेतकरी भालचंद्र पाटील, रामचंद्र मांदारे, चंद्रकांत शितकर, ललित शितकर आणि महिला शेतकरी भगिनी उपस्थित होत्या. यावेळी नम्रताने शेतकरी बांधवाना "एक झाड लाव गड्या, खेळ नवा मांड गड्या" अशी सुरेल आवाजात कविता गाऊन वृक्षारोपण करण्याचे आवाहन केले.