🛑सार्वजनिक दहीहंडी साजरी करण्यास जिल्हा प्रशासनाकडून बंदी🛑यावर्षीही गोविंदाच्या आनंदात कोरोनाचे विरझण..

🛑सार्वजनिक दहीहंडी साजरी करण्यास जिल्हा प्रशासनाकडून बंदी

🛑यावर्षीही गोविंदाच्या आनंदात कोरोनाचे विरझण..

रायगड वेध नागोठणे अनिल पवार

 यंदा देखील जिल्ह्यातील 1909 सार्वजनीक दहीहंडींचे आयोजन करता येणार नसल्याने गोविंदांच्या आनंदावर यंदा देखील कोरोना निर्बंधांचे विरझण पडले आहे. कोरोना रुग्ण संख्येत सध्या घट झाल्याचे दिसून येत असले तरी कोरोना संसर्ग पूर्णपणे थांबलेला नसल्याने गतवर्षी प्रमाणे यंदा देखील सार्वजनिक दहीहंडी साजरी करण्यास जिल्हा प्रशासनाने निर्बंध लागू केले आहेत.

दरम्यान खासगी घरगूती 6227 दहिहंड्यांना मात्र परवानगी राहाणार आहे. त्याच बरोबर जिल्ह्यातील विविध श्रीकृष्ण मठांमध्ये आयोजित करण्यात येणारा गोकुळाष्टमीचा सण कोरोनाचे सर्व निबर्ंंध पाळून, मर्यादित जनसंख्येत साजरा करण्यास मात्र जिल्हा प्रशासनाने परवानगी दिली आहे.

कडक पोलीस बंदोबस्त तैनात

गोपाळकाला सणाच्या अनुषंगाने रायगड जिल्ह्यात कोणताही अनुचित प्रकार घडू नये याकरीता 30 व 31 ऑगस्ट असे दोन दिवस जिल्ह्यात पोलीस बंदोबस्त तैनात करण्यात आला आहे. यामध्ये एक एस.आर.पी.एफ प्लाटून,दोन आर.सी.पी प्लाटून,05 स्ट्रायकिंग फोर्स प्लाटून व 350 होमगार्ड यांचा समावेश आहे. तसेच सर्व उप विभाग व पोलीस ठाणे स्तरावर सर्व उप विभागीय पोलीस अधिकारी, सर्व पोलीस ठाणे प्रभारी अधिकारी व दुय्यम अधिकारी त्याप्रमाणे पोलीस अंमलदार यांच्यास्तरावर देखील पोलीस बंदोबस्त नेमण्यात आला असल्याची माहिती जिल्हा पोलीस प्रशासनाने दिली आहे.

जिल्ह्यात 358 व्यक्तींवर प्रतिबंधात्मक कारवाई

गोपाळकाला सणादरम्यान मागील पाच वर्षात दखलपात्र व अदखलपात्र स्वरूपाचे गुन्हे जिल्ह्यात दाखल असून त्यातील आरोपित यांचेसह शांतताभंग व उपद्रव करणार्‍या सुमारे 125 व्यक्तींवर फौजदारी प्रक्रिया संहिता कलम 107,109,110 प्रमाणे प्रतिबंधात्मक कारवाई आणि फौजदारी प्रक्रिया संहिता कलम 149 प्रमाणे 233 व्यक्तींना प्रतिंबंधात्मक नोटीसा बजावण्यात आल्या आहेत. जिल्ह्यात एकुण 358 व्यक्तींवर प्रतिबंधात्मक कारवाई करण्यात आली आहे.

गोकुळअष्टमी सणाच्या अनुषंगाने शांतता कमिटी मोहल्ला कमिटी व मंडळाच्या बैठका घेण्यात आलेल्या असून कोरोनाच्या पार्श्वभूमीवर सण उत्सव साध्या पद्धतीने साजरे करण्याबाबत शासनाने वेळोवेळी दिलेल्या गर्दी न करणे, सामाजिक अंतर ठेवणे, मास्क परिधान करणे आदी सूचनांचे पालन करण्याचे आवाहन रायगड जिल्हा पोलिस प्रशासनाने नागरिकांना केले आहे.