🛑महाराष्ट्रा......तुझ्या राज्यालाच नव्हे तर भारतालाही आता भास्करराव पेरे पाटील अन पोपट राव पवार सारख्या आदर्श सरपंचांची गरज .......!!

🛑महाराष्ट्रा......

तुझ्या राज्यालाच नव्हे तर भारतालाही आता

भास्करराव पेरे पाटील अन पोपट राव पवार सारख्या सरपंचांची गरज .......!!

🛑पाटोदा आणि हिवरे बाजार ह्या "सरपंचांनी" केलेल्या विकासाच्या जोरावर आदर्श ....!!

🛑"असे सरपंच असतील तर माझा भारत देश महासत्ता होणारच.......!!"

🛑कारण "अभिमानाने सांगतात पेरे पाटील की माझी ग्रामपंचायत महासत्ताच आहे......"!!

रायगड वेध, विजय कांबळे ,कापोली 

"माणसाची इच्छाशक्ती प्रबळ असेल तर या जगात कोणत्याही गोष्टीवर विजय मिळवणं अवघड नसतं ."फक्त आपली ध्येय साध्य करण्यासाठी विचारधारा, मानसिकता आणि दूर दृष्टी असायला हवी. ह्या गोष्टी जर असतील तर यश आणि आपलं स्वप्न पूर्ण व्हायला उशिर लागणार नाही. परमेश्वर तुम्हाला यशाचा महामेरु गाठण्यासाठी आशिर्वाद द्यायला तयारच आहे. मात्र आपण आपली नियत ,प्रामाणिकपणा, आणि बदल घडवण्याची जिद्द ठाम ठेवायला हवी.तरच पुढे काहीतरी आपल्याला मिळालेल्या संधीचे सोने करतोय ह्याचे समाधान चेह-यावर लाभेल...

"भास्करराव पेरे पाटील अन हिवरे बाजार ग्रामपंचायतीचे सरपंच पोपट राव" ही खरतर जादुई अक्षरामध्ये लिहली जावीत अशी कर्तृत्वावर मोठी झालेली महाराष्ट्रातील नव्हे तर भारतातील "आदरणीय" नावे आहेत .कोणताही अनुभव नसताना भास्करराव पेरेपाटील ह्यांनी आपल्या गावाची सूत्र हातात घेतली त्यादिवसापासुन त्या माणसाच्या डोक्यात "आपला गाव जगात वेगळे पण दाखवणारा असावा" हा एकच विचार चालू होता असे ते वारंवार म्हणत असतात.

"मी सरपंच नव्हे तर गावाने मला कामाला ठेवलं आहे ."मला गावाची सेवा करायची संधी देऊन जो विश्वास दाखवला आहे ना , त्या विश्वासाला तडा जाऊ न देता पूर्ण ताकदीने गावाचा काया पालट करुन ग्रामपंचायत कार्यालयातून ह्या प्रवासाची सुरवात केली असे अभिमानाने सांगणारे पेरे पाटील किती वेगळे पण जपतात.ते देखिल एक "तुमच्या आमच्यातीलच

सामान्य माणूस ...."!

आपल्या बुद्धिमतेच्या जोरावर आज भल्या भल्यांना त्या गरीब सरपंचांनी मागे टाकले आहे .त्यांचा अनुकरणाने जवळपास सोडाच पण निदान प्रयत्न करायला काय हरकत आहे. कारण तुम्ही सरपंच पदापासुन दूर व्हाल तेव्हा तुमच्याच मुला बाळांना सहज कुणी विचारले तूझ्या बापाने सरपंच असताना काय केले? तर उत्तर काय देणार?तुमचीच मुलं तुम्हाला शिव्या देणार कारण "हे जग फार वेगळे आहे हे विसरु नका...."!!

"गाव विकासाची स्वतःच्या डोक्यातून आलेली भन्नाट संकल्पना" आणि त्या संकल्पनेचा विचार करायला लावणारी ग्रामपंचायत कार्यालयातून केलेली आखणी कीती सहज आणि सोपी आहे. असे "कुणाच्या लक्षात आले नाही ?की त्याकडे दुर्लक्ष करुन वेळ काढू पणा केला आहे ."हे परमेश्वरालाच ठाऊक. !!

कारण जे "पाणी ,शिक्षण आणि अतिशय महत्त्वाचे म्हणजेच आरोग्य" हे जिव्हाळ्याचे विषय हातात घेऊन ह्या दोन्ही सरपंचांनी भारताला आपल्या कधीच चर्चेत नसलेल्या गावांची दखल घ्यायला भाग पाडले हे "कौतुकास्पदच" आहे .आणि ह्याचे श्रेय नक्कीच सरपंचांना जाते.पेरे पाटील म्हणतात की, "शंभर मांजरं आडवी गेली तरी चालतील पण एक माणुस आडवा जाता कामा नये. ...."

वेग वेगळे प्रयोग आणि त्या सोबत अनेक गावातील अशिक्षित लोकांना सोबत घेऊन चमत्कार घडवायचे म्हणजेच दिव्यच होते. त्यातून ही हुशारीने समजावून सांगून गावातील महिला पुरुष आणि मुलांना कष्ट करून चारपैसे गाठीशी जमवावेत आणि जमलेल्या पैश्यांनी घराचा उदरनिर्वाह करावा इतकंच काय त्यांनी समजावले नाही. तर घर चालवता चालवता बचत कशी करता येईल साठी धडे दिले. 

मग ती पिठाची गिरणी असेल किंवा शेती साठी 

ट्रॅक्टर उभे कसे आणि कुठुन युक्ती करून शेतक-यांना वापरता येईल हे खरचं कल्पनेच्या पलिकडले आहे. 

पेरे पाटील यांचे शिक्षण कीती आहे हो....!

माहीत आहे का...? सातवी पास......विश्वास बसत नाही....एका उच्च शिक्षित इंजिनिअरला लाजवेल अशी त्यांची संकल्पना.....आणि ध्यास...वन टाईम 32 लाख रूपये टॅक्स गावकरी भरतात ही गंमत नाही. विचार करण्यासारखी गोष्ट आहे. 

अनेक देशात जाऊन आपला अनुभव प्रत्येक कार्यक्रमात शेअर केला पण तो किती सरपंचांनी डोक्यात घेतला हाही एक प्रश्न आहे.वेगवेगळ्या योजना राबवून रात्रंदिवस राब राब राबुन ह्या सरपंचांनी गावाला सुजलांम सुफलाम बनवलं सुजलाम सुफलाम हे भिंतीवर बोर्ड लावणं सोपं आहे पण प्रत्यक्ष उतरणं हे सोप नव्हतं.नंदनवन इतक्या सहजा सहजी बनले नव्हते. आपला प्राण पणाला लावला होता. "जीवाचा रान करून वेड्यासारखे गावाचा काया पालट करावा" ह्या विचारांनी झपाटले होते.आणि आता सरपंचांची खुर्ची मिळावी म्हणून साम दाम दंड भेद वापरून मिळवली जाते मात्र विचार मागे पडतात आणि मग "गावाची विकासकामे कुठल्या कुठे फेकला जातो......" 

"होतं ते फक्त वाटोळं"!!

"सरपंच पेरे पाटील म्हणतात "अहो मला पंचवीस वर्षे झाली ग्रामपंचायतीमध्ये पाव टक्के ग्रामपंचायत कळली नाही."वेगवेगळे प्रयोग गावाच्या प्रगतीसाठी व विकासासाठी करत राहिलो आणि तुम्ही सहा सहा महिन्यांत सरपंच सोयी नुसार बदलता हे खेळ आहे का? काय बोलावं अश्या महाभागांना...

"गावासाठी काय केले आणि प्रत्येक ग्रामपंचायतीच्या सरपंचांनी ग्रामपंचायतीच्या माध्यमातून काय करायला हवंय" हे प्रथम समजावून घ्यायला हवंय..."पिण्याचे पाणी पिण्या योग्य सोडाच पण झाडांना घालण्याच्या लायकही नव्हते" पण ,तो चमत्कार मी केला.पाणी प्रश्नाला प्राधान्य दिले. अन पिण्याची पाण्याची वणवण करावी लागत होती ती थांबवली. असे सांगताना फुकट गिरणीतुन दळण लोकांना दिले जायचे हे शक्य नव्हते परंतु ग्रामीण बॅकेतुन कर्ज काढून जे गावाच्या उपयुक्त होत ते ते मी केले .नव्वद दिवसात संडास बांधून गाव हगणदारी मुक्त करण्याचे काम मी गावक-यांना विश्वासात घेऊन केले.अनेक गमती जमती त्यांनी करून गावाला "पृथ्वीवरील स्वर्गच बनवलं" हे सरपंच करू शकतो तर मग आपले पंतप्रधान , लोकप्रतिनिधी ,आमदार ,खासदार ,

जर एकत्र आले तर भारत देश स्वप्ननातील महासत्ता का बनणार नाही .त्यासाठी मानसिकता बदलायला हवी.....

पंतप्रधानांनी हे मनात आणले तर आपला भारत देश कुठल्या कुठे जाईल. भारतातील लोकांचाच अमाप पैसा खर्च करुन देखील कोणतेच कामे ही दर्जाहीन असतात कीती तरी पैसा वाया जातो. एखादा रस्ता मंजूर होऊन तयार झाला, बिल निघाला की त्या रस्त्याची काही दिवसातच चाळण होते.हे पाप कुणाच्या माथी?

रस्ते हा लोकांच्या जिव्हाळ्याचा प्रश्न आहे. पण आज त्याच रस्त्यावरून जाताना वाहनाची गती कमी होते तशी प्रवास करणा-या लोकांची देखिल अवस्था वेगळी नसते. हाडांचा पार खुळखुळा झाला आहे .इच्छा नसतानाही शिव्या शाप देत नाईलाज म्हणून प्रवास करावा लागत आहे .बदल हवा असेल तर कमीपणा वाटून न घेता पेरे पाटील अन पोपट राव या सरपंचाचे विचार अमलात आणा असे लोकं भावनेतून जनतेचा रोष व्यक्त होत आहे. 

त्यासाठी पेरे पाटील अन पोपट राव सारख्या सरपंचांची भारताला खरंच गरज असुन लोकं वाट पहात आहेत की, आमच्या गावाला असे सरपंच कधी लाभणार? आमचे ते नशिब आहे का?असे अनेक प्रश्न आ वासून उभे आहेत...अगदी 

"काहीही दिखाव्यावर नसतं तर ते आपल्या संस्कार अन् कर्तृत्वावर लोकांना दाखवा.....!! अन दाखवण्यापेक्षा आपल्या समाधानासाठी अशी लोकपयोगी कामे करा आणि पेरे पाटील अन पोपट राव यांचे आदर्श घेऊन तसे विचार भारतात रुजवा....तरच आणि तरच हा आपला भारत देश वाचेल अन्यथा जाती पातीमुळे अडलेला माझा भारत देश कदापि "महासत्ता" होणार नाही....

"विचार बदला देश घडेल ....!!"